قصة شعبية من التراث الفلسطيني

السلام عليكم ورحمة الله وبركاته

هذي قصة شعبية من تراثنا الفلسطيني

أرويها كما أذكر أني سمعتها من ستي الله يرحمها

القصة بتقول

كان في راعي غنم برعى وفجأة تغير الطقس وصارت تمطر

قام الراعي شاف مغارة دخل الغنم في المغارة

وكان مع الراعي شبابة طالها وبلش ينفخ بهالشبابة

بعد ساعة من التشبيب قام إنفتحت فتحة بالمغارة وطلعت منها حية كبيرة

كانت حاملة بثمها ذهبة رمتها قدام الراعي وعادت للفتحة وسكرت الفتحة

الراعي خاف كثير وتجمد بمكانه حتى هديت أعصابه قام أخذ الذهبة وشرد لداره

باع الراعي الذهبة وبعد كم يوم قال لحاله بدي أرجع للمغارة كمان مرة

دخل الراعي المغارة وطلع شبابته وبلش يشبب وبعد ساعة

انفتحت فتحة وطلعت منها الحية وبثمها ذهبة رمتها قدام الراعي ورجعت

إنبسط الراعي وصار يجي كل يوم وياخذ ذهبة ويروح

وفي يوم كان الراعي بدو يروح يسافر وفكر شو بدو يسوي

قام جاب ابنه الكبير وفهمه القصة مع الحية وقله بتروح للمغارة وبتدخلها وبتشبب

بتطلعلك حية بترميلك ذهبة بتاخذها وبترجع لحد ما أرجع من هالسفر

سافر الراعي وقام إبنه عمل زي ما حكاله أبوه

بعد يومين فكر الولد وقال لحاله

أما هذا أبوي غبي ليش ياخذ من الحية كل يوم ذهبة أنا اليوم بس تطلع الحية

بدي أقطع راسها وآخذ الذهب كله وخلص بنرتاح من هالشغلة

وبالفعل إجا اليوم وأخذ الولد معاه سيف وبدا يشبب عالشبابة وبعد ساعة طلعت الحية

وبثمها ذهبة وبسرعة قام الولد ضرب الحية بالسيف بس الحية كانت أسرع منه ولفت حالها

قام السيف قطع ذنب الحية هجمت الحية على الولد وعضته وطوالي دخل السم بجسمه ومات

رجع الراعي من السفر شاف أهل البيت زعلانين قلهم شو في

قالولوا إبنك راح زي كل يوم وما رجعش من يومها

راح الراعي عالمغارة لاقى إبنه ميت

أخذ إبنه ودفنه وفي اليوم التالي رجع للمغارة وبلش يشبب ساعة ساعتين ثلاث ما طلعتش الحية

رجع في اليوم إللي بعده وبلش يشبب ساعة ساعتين ثلاث ساعات وما طلعتش الحية

في اليوم الثالث بلش يشبب بعد ساعة قامت الحية طلعتلو

وقالت له روح من هون وما تعاودش ترجع لا أنا بنسى ذنبي ولا إنت بتنس إبنك

إن شاء الله تكون هالقصة عجبتكم